岐阜打雨戰做「大」事

猪拉多纳

FC岐阜開季兩連勝，高踞日乙榜首，今日作客山形山神，個客W居然有6.2倍咁好分，按理就係鬼盤一個。但係凡事有例外，岐阜今季大變身，兼且呢場波可能係爛地混戰，2.65倍「讓球客勝」值得博，1.75倍入球大更加係投X首選。

（開賽時間：周日中午12:00）

坦白講，岐阜上季先排日乙第21位，又難怪足智彩咁唔睇好佢哋。之不過，舊年12月清晒1.36億日圓債務嘅岐阜，呢季新人事新作風，主帥瑠偉引入咗三都主，川口能活一群有J1甚至國腳經驗嘅球員，基本上可以話係脫胎換骨，開季主場兩連勝嘅對手雖則唔強，但都反映出佢哋再唔係班尾波。
山形勁落雪 影響備戰

山形係公認嘅日乙強隊，同湘南、札幌都被視為升班熱門，佢哋今年搵咗前中超杭州綠城U18個教頭石崎信弘揸旗，買入7件新兵，着力強化後防。無疑開季兩場波佢哋都贏唔到，但係輸畀湘南0:1場波，山形嘅射門次數係13比7佔上風，和札幌1:1嗰場亦係16射對10射，形勢上山形贏晒，所以呢班波係有條件主場打低岐阜嘅。

問題係山形嗰邊近兩個星期經常大雪，影響咗佢哋嘅操練，今日雖然據講唔會落雪，但就唔排除有雨，翻查以往山形3次主場鬥岐阜嘅紀錄，其中兩場雨戰都佔唔到甜頭，08年嗰場輸 3:5，13年就和2:2，家陣岐阜又今非昔比，山形好難話W硬，貪心啲不妨博岐阜個「讓球客勝」，求保險咪玩入球大囉，反正大家都有本錢入波。