韋根半場勝有作維

猪拉多纳

英冠補賽串燒和味

周中英冠有三場補賽，今次阿King一炮過同大家講吓呢三場波，首選係剛喺英足盃8強充當巨人殺手嘅韋根主場迎戰伊奧維，其實韋根爆冷踢走曼城之前狀態已經好弗，擊敗曼城之後士氣更係大振，今場對住聯賽榜排尾二嘅伊奧維要贏冇難度，不如博吓半場勝仲和味﹗

（周三凌晨3時45分開賽）

韋根之前挾住5連勝嘅氣勢對住曼城，結果真係爆大冷贏咗呢支英超奪標熱門，跟住下一場險勝錫周三回一回氣後，上場對防守唔差嘅葉士域治又係一場大勝，見到呢隊波真係勒都勒唔住。

而且韋根喺領隊路斯拿接手後攻力強咗好多，攻擊點非常分散，成隊波有7個人入咗3球或以上，雖然冇一個固定嘅神射手，但好處係個個都有入球能力，對方後衞都唔知Mark邊個好，所以呢8場贏波有7場係半場已經取得領先。雖然話伊奧維依家要為護級而搏命，但佢哋作客表現始終唔掂，近5場作客輸足4場，今場都係難敵韋根，與其揀1.36倍嘅主勝，不如試吓1.85倍嘅半場勝仲好喇﹗
查爾頓旺細　QPR利大

另外，啱啱換咗領隊嘅查爾頓會喺主場對般尼茅夫，新帥荷西列加仲未解決球隊攻力超弱嘅問題，令查爾頓冇波入紀錄延續到4場，今場對住近期防守唔錯嘅般尼茅夫都係揀細好過。最後昆士柏流浪憑住借入天才小將拉夫摩利臣，攻力有所改善，此子狀態大勇，近3仗共入4球，今場可以一試入球大。