流浪者主場 劏前鋒

猪拉多纳

小野伸二「無間道」幫到手

今日亞冠盃早場上演H組賽事，澳洲球隊西悉尼流浪者主場對日職川崎前鋒，由於日職仍處於季初，客軍球員明顯未上力，後防又曳，仲要千里迢迢遠赴澳洲比賽，牌面相當輸蝕。流浪者喺澳職常規賽爭標無望，一於疊埋心水踢亞冠盃，加上有小野伸二呢位日本通教路，主場可佔上風。莊家開平手盤，必捧西悉尼流浪者。

（now 670周三下午4時30分直播）

H組蔚山現代實力超班，出線唔成問題，FC貴州只係陪跑分子，餘下一個出線席位成為西悉尼流浪者同川崎前鋒之爭，前者必定把握主場之利優勢，全力搶分。雖然話流浪者近期成績都麻麻，主要受傷兵問題影響，好在首席射手杜米祖歷已經好番，有佢復出大大提升球隊入波能力。

流浪者另一個優勢係擁有前日本國腳小野伸二，呢位中場對日職球隊瞭若指掌，有佢提供情報及教路，應該幫到手。值得一提，小野伸二將於6月重返日本發展，當然希望助球隊出線，嚟個完美告別。
前鋒季初病不設防

川崎前鋒自首輪小勝FC貴州後，就冇場好波，日職開季後3戰僅1和2負，勁失8球，表現猶如不設防。事實上，防守一向係川崎前鋒最弱一環，當佢哋有地利，仲可以憑主場氣勢，以攻代守壓倒對手，但作客就冇呢隻歌仔唱，往往進退失據，今場情況相當不樂觀，平手盤都係撐番主隊好過。