北京以攻代守博大霧

猪拉多纳

亞冠盃F組值得留意，中超球隊北京國安（足智彩譯名：FC北京）主場對澳職代表中岸水手，國安今季聘請西班牙籍主帥文沙奴執教，演出對辦，而且中前場猛將如雲，可觀性甚高。不過，呢支首都勁旅今仗防線人腳嚴重不整，右後衞周挺及門將楊智等四位守將缺陣，後防有暗湧。遇上攻強守弱嘅中岸水手，屆時應不乏入球，主W偏熱回報低，建議博2倍入球大。

（周三晚7時30分開賽）

中超開鑼後，僅北京國安同廣州恒大保持全勝，可見新帥文沙奴有料到，呢位前馬略卡教練手上有大把高質素球員可用，包括尼日利亞前鋒烏達卡、厄瓜多爾中場祖菲古朗、克羅地亞中場達高馬迪，以及協助FC首爾打入上屆亞冠盃決賽嘅南韓國腳河大成。唔好忘記，仲有本土名將邵佳一，以及去過葡萄牙搵食嘅射手張呈棟，中前場人才濟濟。國安經過首兩場分組賽和波後，教練文沙奴今仗應該會擺大個頭，強攻搶三分。
中岸水手殺得性起

問題係國安右閘周挺、門將楊智停賽，另外兩位正選後衞張辛昕、郎征受傷倦勤，後防頓失四位主力，實在牙煙。中岸水手近況唔錯，上輪2比1擊敗日職勁旅廣島三箭，上仗喺爭奪澳職季後賽關鍵大戰，亦以3比1擊敗紐卡素噴射機，士氣非常高昂，就算今仗作客贏唔到國安，亦有力破蛋。