拿玻里絕地反擊撐上盤

猪拉多纳

歐霸盃16強次回合，拿玻里主場再戰波圖。拿玻里上次作客輸0比1只係心態上問題，論實力及整體發揮，佢哋其實比波圖更勝一籌，今次喺非勝不可嘅情況下相信可以踢出真功夫，主隊小讓平半捧上盤。

（有線61台周五凌晨4時05分直播）
波圖門神收咧影響大

波童上次有睇首回合直播，拿玻里初段嘅演出可以用不思進取嚟形容，教練賓尼迪斯或者對自己主場威力太有信心，所以畀人感覺係安於和局，其實論球員級數、實力及經驗，拿玻里明顯高過波圖一班，只要佢哋的起心肝，要攻破波圖大門唔係難事，正如下半場初段拿玻里都有幾次攻門好入肉，如果唔係波圖門將希頓連番「神救」，拿玻里應可取得重要嘅作客入球。呢名神經刀門將喺上場聯賽對士砵亭重創，宣布提早收咧，對波圖可謂一大打擊。

目前拿玻里情況同上一圈對史雲斯好相似，當時拿玻里首回合作客又係一心死守悶和0比0，結果次回合返到主場表現脫胎換骨，成功贏波淘汰對手，今次形勢比上次更差，相信更能激發主隊球員嘅小宇宙全力爭勝。

波圖上場雖然贏波，但以一支主隊嚟講發揮只係一般，摩天奴離隊後中場明顯冇咗重心，哥利斯馬亦太過個人主義，今場後防仲冇埋希頓及停賽嘅中堅阿歷士辛度，攻守都畀唔到球迷信心。相反拿玻里希古恩、荷西卡利祖及咸錫等主力全部可以候命，有力上演一幕絕地反擊。