曼城打吡戰前壯聲威

猪拉多纳

英超爭標進入大直路，曼城相當有機會後來居上，皆因佢哋已經冇盃賽牽掛，聯賽失分屬於各隊最少，換言之贏晒餘下比賽，即可捧盃。以呢支富貴球隊嘅強大人腳，絕對有能力做得到。曼城今晚主場對包尾嘅富咸，正好趁機爭取大勝，為下周中曼徹斯特打吡戰壯聲威。即使曼城讓兩球，都直取讓球主勝。
精力過剩炒得起富咸

曼城班主文梳亞為球隊投入龐大資金，當然唔會只滿足於一個英聯盃錦標，隨住球隊早前連接於足總盃及歐聯出局，領隊比歷連尼壓力愈來愈大，對英超冠軍可謂志在必得，否則隨時步前主帥文仙尼後塵執包袱。曼城人腳充裕，足以應付多線作戰，依家只需專心踢聯賽，變成「精力過剩」，可以盡情發洩炒對手。

曼城雖然落後榜首車路士6分，但踢少3場，理論上比車仔失少3分，贏晒足以做一哥，未來賽事勢必全力踩油衝刺。曼城今季12場聯賽主場勝仗，有6場淨贏對手3球或以上，讓兩球都捧得過。

富咸上月中由馬加夫接手執教後，表現唔見有起色，最離譜係作客1比3輸畀另一支護級分子卡迪夫城。防線仍然患得患失，試問點頂得住曼城強大火力。
now 622 周六晚11時直播

猪拉多纳