紅透紅軍直搗紅龍

猪拉多纳

今期英超最紅一定非「紅軍」利物浦莫屬，上周作客大炒國家死敵曼聯3粒，聯賽累積5連勝，升上積分榜第2位，真係紅到發紫﹗今晚「紅軍」要作客另一支表面上好紅嘅卡迪夫城，「紅龍」換咗曼聯名宿蘇斯克查執教後繼續冇起色，今場讓球客勝捧得過。

一踏入2014年就係利物浦嘅天下，除咗聯賽保持不敗外，「紅軍」今年踢咗10場英超賽事有8場係贏波，狀態弗到可以媲美德甲班霸拜仁慕尼黑同西班牙嘅「銀河艦隊」皇家馬德里，以「紅軍」咁嘅班底、喺咁激烈嘅聯賽參戰，能夠踢出咁好嘅成績，真係令人難以置信。利物浦上周仲要作客贏埋宿敵曼聯，球員士氣極之高昂，蘇亞雷斯、史杜列治、謝拉特等主力唔使講都知犀利，負責做髒活嘅中場佐敦軒達臣、祖阿倫，以及後防法拿根、史卡迪爾等亦功不可沒，閘位新星法拿根更會獲得一紙新約以作獎勵，至於最大功臣領隊羅渣士日前更大派定心丸，話利物浦就好似佢屋企，無意離隊他投。利物浦有咁多好消息，隊中又剩番荷西安歷基一個傷兵，今場有望繼續上演大屠殺。
卡迪夫城頹勢持續

「紅龍」卡迪夫城表面睇起嚟好紅，但球隊內部一啲都唔「紅」，首先有個麻煩老細陳志遠喺度搞搞震，「紅龍」畀佢搞到立立亂，即使搵嚟紅魔名宿蘇斯克查領軍都「紅」唔起，頹勢持續，護級大戰贏咗富咸都係於事無補，極大機會降班，今場對住裏裏外外都好紅嘅利物浦更係捧唔落手﹗
now 621周六晚11時直播