韋斯咸主場大慣曼聯

猪拉多纳

曼聯周中歐聯擊敗希臘奧林比亞高斯闖入8強，一眾球員個心依家雄晒，今晚作客韋斯咸相信會照樣搶攻。不過，韋斯咸近期主場表現唔錯，更錄得三連勝佳績，今仗絕不會踢守勢波，加上兩軍近年於烏普頓公園球場交鋒例必出現大手交易，今仗一於捧入球大。
朗尼：進攻係紅魔DNA

曼聯上仗聯賽以0比3不敵利物浦，但球隊成功喺周中嘅歐聯16強次回合上演絕地反擊，主場以3比0擊敗奧林比亞高斯，兩回合計反勝3比2晉級。一眾曼聯球員現時處於亢奮狀態，主將朗尼更指進攻係紅魔嘅DNA，球隊今仗雖有尼曼查維迪停賽無法上陣，而射手尹佩斯喺歐聯受傷上陣成疑，但今仗相信仍會大踢進攻足球爭取勝利。

韋斯咸聯賽雖錄得兩連敗，但呢兩場都係作客賽事，實在不足為據。「錘仔幫」主場戰績其實不錯，對上三場賽事皆贏波，主帥艾拿戴斯指球隊只要多取7分便可以提前上岸，主場出擊相信不會踢守勢波。此外，兩軍近年喺烏普頓公園球場交鋒都上演入球騷，對上五次交手每仗起碼出現四個入球，今仗相信入波一定唔會少！
now 621周日凌晨1時30分直播