藍戰士SHOT 搞寸雲格1000Party

猪拉多纳

莫連奴搞寸雲格Party！教咗阿仙奴18年嘅雲格，今晚第1,000次帶領「兵工廠」出擊，不過呢個大喜日子嚟得好唔合時！事關「教授」從來未試過揪低莫連奴，而且車路士喺史丹福橋打橫行，相信由夏薩特領銜嘅「SHOT（射門）組合」會射到「兵工廠」成身子彈窿，車路士讓半一，要2.15倍上盤。

（now621台周六晚8:45直播）

呢場「倫敦打吡」全球矚目，除咗話雙方都係今季英超爭標熱門，早排莫連奴同雲格嘅罵戰亦肯定令今仗升溫。「寸王」上個月指雲格係「失敗專家」，適逢「教授」今晚第1,000次帶領阿仙奴出擊，佢肯定想用勝利助興兼出番口氣，不過睇番戰績，呢個機會似乎好微喎！
雲格撼寸王未贏過

自稱中咗「足球毒癮」、欲罷不能嘅雲格，歷嚟10次同莫連奴交手，只得5和5負，無疑「兵工廠」上仗砌低熱刺令軍心大振，但熱刺呢排狀態係點，大家有眼睇，勝仗唔足以反映「兵工廠」嘅狀態。況且艾朗藍斯要抖多10日先復出，中場雙核奧斯爾、韋舒亞又養緊傷，靠辛迪卡索拉同路斯基想撼贏車路士條硬淨中場線？妙想天開啦！

隨住上場聯賽倒灶輸畀維拉，車路士目前只係領先踢少場嘅利物浦同阿仙奴4分，為鞏固榜首席位不容再失。係，「森巴孖寶」拉美利斯同韋利安今仗要坐波監，但「藍戰士」勝在兵源充足，預計約翰米基爾同舒賀爾尼將會頂替2人位置，攻、守能力依然Keep到。
車仔SHOT組合喪入波

最重要係由舒賀爾尼（Schurrle）、夏薩特（Hazard）、奧斯卡杜斯山度士（Oscar）同費蘭度托利斯（Torres）合組嘅「SHOT組合」威力強勁，今季合力炮製咗29個聯賽入球，佔全部「士哥」嘅51%，「藍戰士」今季嘅場均射門次數更高達17.1次，食住周中歐聯以總比數3:1淘汰加拉塔沙雷嘅強勢，要砌低阿仙奴唔難吖！
數讀‧教授

11:攞過11次冠軍，包括3次英超、4次足總盃同4次社區盾。

17:連續17季帶領阿仙奴成為英超前4分子。

57.96%:999場比賽贏咗579場（和223、負197），勝率達57.96%。

180:雲格一共起用過180個球員，英格蘭62人、法國24人。

1845:阿仙奴喺雲格帶領下總共射入1,845球，平均每場1.8球。
Data King：車仔地頭未輸過

‧阿仙奴今季兩鬥車路士都入唔到波。

‧莫連奴領軍從未輸過畀雲格，戰績為5勝5和。

‧車路士係今季英超唯一主場不敗嘅球隊。