主場出擊火力全開畢爾包爆「基」大炒格

猪拉多纳

今晚西甲畢爾包主場迎戰基達菲，畢爾包每次主場出擊都極之進取，就算巴塞、皇馬都要喺佢哋地頭失分，足證威力十足。近兩仗賽和華倫西亞同維拉利爾兩支同級球隊，今晚對住3個月都未贏過波嘅基達菲，係時候大炒振聲威，主隊讓一球，一於捧1.8倍「讓球主勝」。

（開賽時間：周日清晨5:00）
基達菲守齋3個月

畢爾包主場威力強勁，今季聯賽只係輸過1場，佢哋踢法具侵略性，進攻瓣數多，其中球隊首席射手阿度里斯近期狀態弗到漏，近3仗攻入5球。仲有呀，中場伊拜高美斯活動範圍大，經常後上殺入禁區射波，令對手防不勝防，至今貢獻8個入波，今晚有力再數胡。

基達菲自從去年12月中贏波之後，已經守齋超過3個月，聯賽僅多尾三嘅華拉度列2分排尾四，再咁落去降班都似。隊波最大問題係鋒力極度疲弱，呢3個月踢咗14場波，食白果場數竟然多達10場，畢爾包見你冇還手力，一定火力全開，爭取士哥攞晒3分啦！