拜仁冠軍在望開殺戒

猪拉多纳

緬恩斯遇強隊例輸波

已經喺聯賽拋開次席多蒙特23分嘅拜仁，只要今晚作客打敗緬恩斯，加上第2、3位嘅多蒙特同史浩克04失分，就可以提前8輪聯賽奪冠，第23次成為德甲盟主。既然目標清晰，主帥哥迪奧拿今晚肯定落格殺令，1.64倍「讓客」唔好錯過。

（有線61、201周六晚10:30直播）
拜仁專揀作客封王

講起拜仁奪標，原來佢哋對上7次聯賽稱王都係喺作客比賽完成，相信佢哋都唔想呢個「作客封王定律」紀錄斷纜，今仗肯定搏盡。需知拜仁今季目標唔止要捧走聯賽冠軍，仲要衞冕歐聯同德國盃，前日同球會續約3年嘅主力洛賓都話，就算球隊喺今晚奪冠，都唔會用太多時間慶祝，因為要繼續專注其他賽事。睇見班波咁認真，今晚仲點會留手先？
岡崎慎司入多2粒平紀錄

事實上呢支德甲勁旅今仗可以強陣出擊，無論派列貝利、洛賓、湯馬士梅拿定馬里奧葛斯落場都好，都有條件以超強火力砌低對手，加上復出後愈戰愈勇嘅中場舒韋恩史迪加坐鎮中場，加強組織力之餘亦為防線添上一道屏障，令人更有信心。

緬恩斯今季成績予人驚喜，暫時以41分排喺第5位，大有機會參戰下屆歐洲賽賽事。而且射手岡崎慎司只要喺聯賽入多2球，就追平國家隊隊友香川真司2年前創下日本人喺德甲一季射入13球嘅紀錄，可惜佢哋今晚對住打遍德甲無敵手嘅拜仁，相信未係時候改寫紀錄。

睇番緬恩斯今季主場對多蒙特、利華古遜同史浩克04等前列球隊都輸波收場，相信今晚都係凶多吉少。
乜都玩錦囊：中位數3.5球照捧入球大

拜仁今仗隨時可以贏波封王，成班波肯定搏到盡，不過緬恩斯亦唔係善男信女，射手祖普莫亭狀態大勇，加上佢拍檔岡崎慎司亦想打破香川真司喺德甲單季聯賽入球紀錄，兩人夾手夾腳整番粒都唔出奇。就算入球中位數升至3.5球，照捧2.02倍入球大。
Data King：拜仁德甲50場不敗

‧拜仁聯賽跨季50場不敗。

‧雙方近6次交手，當中4場出現至少4個入球。

‧緬恩斯射手祖普莫亭近5場射入4球。