準備就緒1600米夠殺

猪拉多纳

　　上一期阿棟賽前講過，打吡大賽日係熱門客重擊之時，結果當日好多大熱門都好生性，只有1匹冇三甲，「好熱之徒」點都應該搵到餐茶。但今日情況好唔同，感覺暗湧處處，奉勸一句，上周日利熱門，唔代表今日一樣。

　　第一場新馬1000米。「誇惑」拍賣價差唔多要4球，呢個數目唔大亦唔細，有冇入錯貨？一時間好難預測得到。

　　誇惑憑質出擊

　　不過，睇番「誇惑」試閘片段，雷神末段騎到死唔死，衝勢唔係好勁，大家係有眼見，但係雷神冇嫌棄，肯為呢匹新馬操刀，話唔定跑質夠殺。

　　第四場四班1600米。「準備就緒」至今跑過兩場，走勢一場近過一場，上場轉跑1400米已經見影，輕輕鬆鬆追入殿軍。

　　睇馬樣，「準備就緒」一定係中長途材料，假以時日，1800米及2000米仲好跑，但係依家只得3歲，唔使咁快跑到咁長，脆脆哋跑住1600米都ok。睇埋隔晚票數，賠率熱得嚟合理，同場有另一熱門「招財快駒」遮掩之下，「準備就緒」獨贏有4倍，點會博唔過？

　　第六場四班1000米。「金珀龍華」來自吳定強馬房，大家有睇開阿棟專欄的話，知我好少貼阿強啲馬，呢次都抵唔住頸。

　　無他嘅，呢隻馬長相唔錯，賽前試過兩課大閘，跑完第三跟住贏馬，走勢都好對辦，呢類不明物體有權殺晒，為咗驚走寶，不如買定先，如果食到頭啖湯，賠率一定好好分。(陳華棟 資深評馬人)