奧漢倫斯打完敗仗進貢國民

猪拉多纳

除咗足球，OOO一向醉心音樂，近月一直忙於創業，自資開唱片舖，雖然只係小生意，但興趣同滿足感就大於一切，所以都少咗喺歐陸連線同大家見面，不過今晚葡超有場好嘢忍唔住要同大家分享，榜尾奧漢倫斯啱啱打完一場慘痛敗仗，搞到唔見咗大半隊主力，主場迎戰正力爭下屆歐戰入場券嘅國民隊唔夠砌，客Ｗ係誠意推介。

（周日晚11時開賽）

奧漢倫斯上輪作客同屬下游嘅阿洛卡，係至關重要嘅護級大戰，雙方落場已經唔係打波咁簡單，簡直係打仗，全場踢人多過踢波，結果搞到球證要出示1紅11黃嚟控制場面，場波能夠順利踢完都算佢叻，最終阿洛卡技勝一籌主場贏2比0，進一步掟甩榜尾嘅奧漢倫斯。
主隊5將停賽6將負傷

對於奧漢倫斯嚟講，輸波固然慘，最弊仲要損兵折將，陣中有6名球員領牌，當中後防主力路爾斯菲臘、馬丹、中場施利斯天奴、贊迪列比路同翼鋒保羅沙治奧5名大將都累積夠5面黃牌，全部要停賽，加上中場菲美巴路根、馬里奧辛坦拿、前鋒麥美迪同首席射手迪安尼斯今晚都因傷缺陣，另外兩名中場雷杜亞迪同奧保度亦上陣成疑，超過大半隊唔踢得，令呢支哀兵搶分更唔樂觀。

國民隊近期兩連敗都只因對手係勁旅布拉加同賓菲加，目前仲要力保前5名下屆歐洲賽參戰資格，今仗當然會把握對手超殘陣呢個黃金機會博反彈。