拿玻里爭老二主場殺無赦

猪拉多纳

意甲好戲碼，拿玻里主場迎戰費倫天拿，兩隊同樣剛於歐霸盃出局，但今仗回歸聯賽，雙方處境好唔同。拿玻里冇時間哭波喪，急需搶分追趕次席羅馬，希望攞到亞軍，直接晉身下屆歐聯分組賽，鬥心仍然強橫。反觀費倫已經落後拿玻里10分難免洩氣，球員現時可謂身心俱疲，受讓都冇着數，簡單要主勝。

（TVB 301周一凌晨1時30分直播）

拿玻里爭標冇份，但仲要為亞軍而戰，皆因二、三位有好大分別，季軍需要踢歐聯外圍賽，必然影響球隊季前備戰。教練賓尼迪斯身為歐戰老手，自然深明當中利害，肯定下令全力爭老二。拿玻里目前落後次席羅馬3分兼踢多1場，其實仲有得追，最緊要做好自己，每場攞足3分。呢支意大利南部勁旅近期喺聯賽發揮出色，包括擊敗追趕目標羅馬，今仗遇上費倫天拿並未驚過，讓半一絕對有道理。
費倫連場硬仗腳仔軟

費倫天拿最大問題係人腳有限，但要三線作戰，下半季明顯吃不消，連盃賽在內近7仗只係贏過弱隊基爾禾。值得一提其中3次鬥祖雲達斯，踢到腳仔軟。球隊欠缺明確目標，兼經過連場硬仗煎熬，體力同意志都備受考驗，依家又要鬥拿玻里，諗起都心寒。另外，雙方近4次對壘，拿玻里取得3勝1和，數據、戰意及實力都佔上風，主勝穩陣。