「二因一果」皇馬可報仇

猪拉多纳

歐聯8強抽籤塵埃落定，對賽組合好理想，皇馬、巴塞、車路士、拜仁都避開對方，提升上演夢幻決賽嘅機會。Peter率先講兩個對賽組合，皇馬鬥多蒙特、拜仁對曼聯。「銀河艦隊」目前勢頭相當好，睇好佢哋可以一報上屆被多蒙特淘汰之仇，理由可歸納為「二因一果」。
巴利融入 賓施馬受惠

首先，皇馬教練安察洛堤第一季執教，仍然同球隊處於蜜月期，通常新人事都可以擦出火花。當然肥安屬於有料之人，過去帶隊踢歐聯戰績彪炳，「銀河艦隊」喺佢率領之下，成績自然好。其次，C朗保持勇態之餘，新加盟嘅加里夫巴利擺脫季初傷患，並已融入球隊，同C朗發揮強大側擊威力。一般後防最驚側擊，更何況面對一對頂級翼鋒，更加防不勝防。結果就係賓施馬成為最大受惠者，獲得大量傳球供應，入波更得心應手。

值得一提，皇馬出售希古恩後，令賓施馬更專注比賽，以往佢經常心掛掛，擔心冇出場機會，連帶影響個人表現，搞到患得患失。現時佢奠定正選，可專心為球隊作出貢獻，唔使再做出一啲為爭位嘅「傻事」。表面上似欠缺競爭，但其實係反璞歸真，屬於上乘兵法，值得了解。

至於拜仁抽到好籤，遇上今非昔比嘅曼聯，仲要紅魔鬼射手尹佩斯受傷長抖，拜仁晉級機會高唱入雲。
金句：皇馬Top Form有因果