28鏡頭直播123億激戰皇馬現形怕巴塞

猪拉多纳

最激「國家打吡」全球矚目！今季西甲爭標形勢絕對係近年最激烈，皇馬今晚主場惡鬥世仇巴塞，為咗呢場兩軍身價總值11.5億歐元（約123億港元）嘅富貴大戰，電視台將會出動28支鏡頭為全球4億觀眾全方位直播賽事。雖然巴塞近況唔算好好，但小妹相信佢哋對親皇馬會打高一皮，今晚唔會咁易認輸，巴塞受讓平半必捧1.93倍下盤。

（now632台周一凌晨4:00直播）

話今場打吡係近年最激烈絕冇誇張，今季西甲「三雄爭霸」，榜首皇馬同排第3嘅巴塞相差僅4分，今戰對冠軍誰屬無疑有決定性作用。《阿斯報》話兩軍球員身價都屬於全球頂級，巴塞嘅5.8億歐元同皇馬嘅5.7億歐元不相伯仲，並遠超英超「億萬大軍」曼城（4.5億歐元），淨係班天價球星都夠晒叫座力啦！
最多觀眾比賽4億人收睇

呢場全球矚目嘅賽事預計將吸引4億人收睇，成為最多觀眾嘅足球比賽。負責直播賽事嘅Mediapro，更出動4部大型貨櫃車運送28部高科技攝影機，由分布喺球場每個角落嘅300位專業人員操作，當中唔止出動名為「4K」嘅技術，提供畫質比以往清4倍嘅畫面，加上超級慢動作攝影，無論係布斯基斯嘅演技定係比比嘅誇張犯規都肯定逃唔過鏡頭！

講番場波本身，無疑巴塞近況唔算太好，喺聯賽先後敗予皇家蘇斯達同華拉度列，令爭標形勢由主動變被動。好彩嘅係美斯及時復勇，近9戰得1場「食白果」，上仗對奧沙辛拿更加大演帽子戲法，力證霸氣依然。隊友恩尼斯達走出太太流產嘅陰霾後，亦喺上場取得士哥，加埋巴塞近6次作客巴拿貝球場勝和負各2場即有4次不敗，皇馬想砌低死敵唔係話咁易。
皇馬西甲遇強3戰不勝

無可否認，皇馬今季戰績比去季穩定得多，喺正式賽事嘅不敗紀錄已增至31場。不過值得留意嘅係，佢哋今季喺聯賽鬥馬體會同巴塞嘅3仗全部贏唔到，當中C朗亦只得1球進帳，似乎一對同級球隊就「現形」，今仗想贏波拎3分，真係有難度o架！
Data King：C朗 美斯打吡戰腳風順

‧皇馬及巴塞近3季已對賽18次，其中巴塞獲7勝7和4負。

‧C朗拿度近6次為皇馬鬥巴塞共射入5球。

‧美斯則以18個入球，列國家打吡史上次席射手。
乜都玩錦囊：國家打吡開慣「大」騷

正所謂「國家打吡打甩髀」，雖然皇馬巴塞一年可以鬥足6、7場，但每次有演技、有片開之餘，最緊要係多波入吖嘛！兩軍各自擁有C朗、美斯兩位頂級入球機器，難怪近6次對戰，有5次都出現至少3個入球，1.54倍入球大最抵捧。