馬體會「讓客」殺「迪」

猪拉多纳

攞晒3分有權上榜首

西甲今晚上演「國家打吡」，現時同皇馬、巴塞鼎足嘅馬德里體育會就漁人得利，作客貝迪斯肯定會把握機會攞足3分啦！貝迪斯周中喺歐霸同西維爾激戰120分鐘，最後互射12碼落敗出局，只係隔3日又要再上賽場，無論體力同士氣都肯定處於低點。再講馬體會實力高貝迪斯唔止兩班，近況又比較Fit，睇唔到有咩理由會失分，馬體會讓一球，2.45倍「讓球客勝」可以放心追捧。

（now632台周一凌晨0:00直播）

貝迪斯今季前線除咗魯賓卡斯度叫做踢出水準，其他球員都喺水準之下，導致聯賽落後尾二嘅艾美利亞有7分之多，成為降班大熱。其實貝迪斯近況真係唔錯，上周中踢歐霸盃之前保持5場不敗，可惜响歐霸盃16強次回合有兩球優勢之下，都要畀西維爾反客為主逼和兼射輸12碼，貝迪斯呢道氣洩咗認真大件事，士氣難免受挫，今晚對住馬體會難望爆冷。
哥斯達Fit爆 「床單兵團」3連勝

馬體會暫時落後皇馬3分排第2位，由於今晚皇馬會同巴塞大戰，所以「床單兵團」有機會再搶佔榜首。馬體會喺打吡戰賽和皇馬之後，最近連贏3場重拾霸氣，射手迪亞高哥斯達狀態返晒嚟，近兩仗攻入3球，對住防守力勁差嘅貝迪斯，又係爭取士哥嘅時候。最重要係馬體會上周中冇歐聯賽事，養精蓄銳迎接今仗，要大炒貝迪斯絕對無難度呀！