鬥「聖人」反彈良機熱刺再煲魚生粥

猪拉多纳

熱剌啱啱喺歐霸盃出局，聯賽又連輸兩場，近4場波都未贏過，相信令唔少Fans心灰意冷。呢支倫敦球隊今晚喺白鹿徑恭候修咸頓，Yennie認為熱刺係時候喺英超做番齣好戲，但要數近況唔錯嘅修咸頓開「讓主」有一定難度，敲3.6倍「讓球和」博熱刺小勝啱數！

兩場「倫敦打吡」輸晒，兼且喺歐霸盃16強止步，齋睇近績就真係衰到貼地，但小妹想幫熱刺講番句公道說話，佢哋上輪聯賽僅負阿仙奴0:1場波查實踢得唔曳，周中歐霸盃次回合2:2賽和賓菲加一戰，亦睇得出熱刺眾將嘅鬥心，Yennie相信佢哋Keep住呢團火嘅話，要砌低修咸頓及時反彈絕對有可能。

熱刺後防續有隊長戴臣、中堅基利捷斯同右閘基爾獲加倦勤，不過維頓漢刑滿復出，法國中堅卡保奧亦告傷愈，後防兵源問題照計得到紓緩。後防硬淨番，中場嘅迪比利同基斯甸艾歷臣就可以冇後顧之憂，放膽谷上去為艾迪巴約提供支援。
近5次交手3場僅贏1球

對家修咸頓最近錄得兩連勝，睇落好似好堅，但留意番對手只係水晶宮同諾域治兩支中下游分子，勝仗唔足以反映「聖人」狀態。睇番往績，修咸頓近5次撼熱刺輸足4次，似乎畀呢支倫敦球隊食住喎，不過呢4場敗仗當中，「聖人」有3次係僅輸畀熱刺1粒，考慮到雙方戰鬥力差距唔算大，預計就算修咸頓輸都唔會輸得太難睇，博熱刺小勝。