多摩川打吡又玩「大」龍鳳

猪拉多纳

川崎假波案甩身

川崎前鋒涉及打假波？係喎，早個禮拜佢哋確係畀人查過，但係冇證據證明到，所以算係清白。今日呢支有前冇後嘅球隊，响日職作客FC東京合演「開胡之戰」，相信又係一場大龍鳳，1.59倍入球大最穩陣。

（有線61、201周日晚6:00直播）
逆轉負廣島注碼突增10倍

嗰單假波疑案係呢個月8號嘅廣島三箭對川崎前鋒，場波係川崎半場領先一球，廣島下半場逆轉反勝2:1，日職個網上菠菜預警系統發現，海外莊家嗰場波收到嘅注碼，竟然係平時嘅10倍，於是自然懷疑場波造假，賽後雙方共有50人被邀助查，但係得出結論係冇假波成分。

冇證據，我哋唔可能話川崎造波，而且呢隊波係就係攻擊力強，中村憲剛、大久保嘉人搭雲拿天奴嘅組合，可以話係日職最強三叉戟之一，但係佢哋開季6場波，只得一場亞冠盃贏到，聯賽就3戰不勝，原因係後防太渣，對廣島、神戶同大宮都係領先下和波或者輸埋，根本係隊唔識防守嘅神經波。

對家FC東京同川崎一樣，今季3場日職2和1負未開胡，不過佢哋嘅情況有啲唔同，因為換咗意大利佬費卡丹迪揸旗，人腳強咗，問題係仲適應緊新教頭嗰套攻守平衡法則，所以有啲兩頭唔到岸，前面有干卡維斯入波，但係後邊就經常揩嘢，主場唯一優勢係有把握入波多過對手。由於兩隊都急住要開齋，打死罷就，呢場多摩川打吡唔博大博乜？