留力雙線作戰 西悉尼細好過W

猪拉多纳

西悉尼流浪者依家除咗要爭取季後賽席位外，同時又要兼顧亞冠盃分組賽，都咪話唔辛苦。佢哋今日下晝喺澳職主場對狀態差到爆嘅珀斯光輝，贏波相信問題唔大，但想入多兩粒就令人有所保留，撐1.92倍入球細好過冇肉食嘅主W。

（開賽時間：周日下午2:00）
珀斯光輝作客鋒力最弱

西悉尼流浪者有前鋒杜米祖歷、守將史柏拉洛域傷愈回歸，基本上可以強陣出擊，兼且對手只係連續9場未贏過嘅珀斯光輝，照理要攞足3分真係冇咩難度。但值得留意嘅係，由於流浪者要分心亞冠盃，所以今日已經係佢哋喺15日內踢嘅第5場賽事，即使球隊保持輪換，球員體能始終受到影響，相信流浪者領先後就會放慢節奏，無謂要班波搏到殘。

珀斯光輝上仗主場以1:2輸咗畀墨爾本勝利後，出席季後賽嘅機會只係剩番數字上嘅可能，球隊士氣跌到落谷底，唔單止咁，最近佢哋更傳出部分球員同班主鬧不和，認真濕滯。事實上，珀斯光輝係澳職作客火力最弱嗰隊，12場入得嗰9球，依家仲要軍心不穩，又欠缺破關本錢，相信幾難威脅對方大門。