艾美利亞護級焗攻 皇蘇上盤睇定食

猪拉多纳

雖然今晚得３場波玩，但貴精不貴多，阿King依然搵到好嘢，例如本周西甲壓軸好戲艾美利亞主場迎戰皇家蘇斯達，尾二嘅艾美利亞為護級急需搶分，惟有硬着頭皮焗攻，不過遇上反擊極快嘅皇蘇，艾軍咁做盞死快啲，皇蘇小讓平半上盤咪錯過。

（周二清晨５時開賽）

今季西甲護級形勢立立亂，除咗包尾嘅貝迪斯被甩開之外，未計周日晚成績，排第13嘅馬拉加同尾三嘅華拉度列只差５分，非常緊湊，因此尾二嘅艾美利亞仲未絕望，佢哋近期決定放手一搏多啲進攻，反而令後防暴露更多空位，連輸３仗失10粒，上仗護級６分波對華歷簡奴都搏輸，證明呢招唔多掂，今仗仲有前鋒洛迪里奧斯停賽，攻力弱上加弱。雖然「五哥」皇蘇畀死敵畢爾包拋離９分，但少踢一場，佢哋對下屆歐聯入場券未死心，其中法國翼鋒基沙文極為渴望趕上世盃尾班車，餘下聯賽必加多兩錢肉緊，既然艾美利亞不自量力焗攻，益晒速度極快嘅基沙文同卡路士韋拿打反擊喇，皇蘇今仗小讓平半，上盤非常值博。
串埋梅斯Ｗ塞圖巴爾下盤

至於法乙一哥梅斯主場對比斯特，前者防線固若金湯，等閒球隊難越雷池半步，撞正比斯特上周中多踢一場，體力輸蝕，以逸待勞嘅梅斯為盡早鎖定升班資格唔會腳軟，主勝有計。最後葡超艾斯杜尼近況唔曳，曾擊敗波圖及布拉加，不過佢哋要作客近13次主場僅一敗嘅塞圖巴爾，要讓到半一實在過晒火位，寧捧下盤。

猪拉多纳