國米誓搵烏甸出氣！

猪拉多纳

阿根廷雙煞火力強到痹

國際米蘭近期重新振作，主要原因係印尼會長托希爾繼落實來季簽入尼曼查維迪後，前日仲發表「下季壯大」宣言，預言大班球星會登陸聖西路，國米戰將為保住飯碗梗要搏命！適逢「阿根廷雙煞」柏拉斯奧同莫路伊卡迪腳風勁順，今晚對住作客例牌腳軟嘅烏甸絕對係搶分良機，一吐上場輸畀阿特蘭大嘅烏氣，國米讓半一捧上盤！

（TVB301周五凌晨3:45直播）

國米會長托希爾前日向雅加達傳媒表示，由依家到季尾係一個「考試」，用嚟評核陣中球員邊個有得留低，佢仲話：「迪斯高、費蘭度托利斯、艾華路莫拉達都係我哋嘅目標，只要教練團認為邊個適合，我就會作出收購。」

咪以為托希爾咁講會搞到人心惶惶，會方禮拜一已經同哥倫比亞中場古亞連續新約至2017年，證明托希爾絕對唔會待薄肯付出兼交到貨嘅球員。
15戰僅1場不失烏甸作客例腳軟

為來季飯碗着想，班球員自不然搏命，近期連環搶分成功嘅「藍黑兵團」，家陣只係落後第4位嘅費倫天拿4分，要爭入前4仲有機會。首席射手柏拉斯奧今季聯賽已經轟入13球，佢嘅阿根廷同胞莫路伊卡迪上仗首度擔正亦有進帳，有呢對「阿根廷雙煞」衝鋒陷陣，配合埋靴蘭尼斯穿針引線，火力絕對信得過。雖然上仗國米喺主場輸畀阿特蘭大，搞到球迷跌晒眼鏡，但呢場波「藍黑兵團」佔盡上風，仲有兩次攻門中柱，輸波真係好唔抵，今晚搵烏甸尼斯出氣就最啱！

之所以睇小烏甸尼斯，係因為佢哋今季15場意甲作客賽事，只得1場保持清白之身，後防已經唔穩陣，右閘杜辛巴斯達今晚又要停賽，點頂得住國米嘅進襲？再講，最近有傳以迪拿達利為首嘅戰將想逼走教練古度連，陣營士氣都勁沉，今仗去到聖西路睇怕聽炒。
Data King：黑仔國米係意甲中柱王

‧國際米蘭係意甲「中柱王」，今季已經中楣、柱18次。

‧雙方近6次交手有4次開大。

‧烏甸尼斯連開6口角球大。
乜都玩錦囊：1.85倍入球大抵玩

烏甸尼斯今季作客得1場成功保持清白身，近3仗客戰場場失3球，連對住卡利亞里呢啲「二打六」球隊都畀人隊3粒，造訪國米唔慌有運行，1.85倍大咪錯過。