拜仁狂歡過後難炒賀芬咸

猪拉多纳

喺德甲豪取19連勝嘅「宇宙最強」拜仁慕尼黑上輪已經提前奪冠，要搵支球隊停低佢哋真係幾艱難，不過嚟到呢一刻亦係拜仁最放鬆之時，今晚佢哋主場迎戰賀芬咸，賽前準備鬆懈咗，又有歐聯後顧，加上客軍有態有Heart又毫無壓力，分分鐘可以做攔路虎。

拜仁啱啱周中快車作客擊敗哈化柏林，喺首都破紀錄提早七輪封王，賽後特准全體職球員癲番晚，當晚喺柏林夜店狂歡七小時，連教練哥迪奧拿都脫下西裝解下領呔同球員一齊跳舞，部分球員包括湯馬士梅拿等更玩到通宵至離開。拜仁喺德甲完成衞冕任務後，目標已經瞄準咗三日後歐聯半準決賽首回合作客奧脫福嘅比賽，哥迪奧拿畀球隊喺星期三、四休息，今仗賽前基本上冇乜備戰，亦肯定會畀主力球員養精蓄銳，隨時會大輪換，今季較少上陣嘅迪亞高干坦圖、梳頓沙基利、雲拜頓、比沙路甚至丹麥小將賀積查治等都會得到機會，唔係話拜仁會放棄今仗，但落到場就好難好似之前咁肉緊咯！
基斯度乜都夠膽死

賀芬咸近期聯賽兩連勝已遠離降班威脅，冇晒壓力，教練基斯度明顯係一位冒險家，乜都夠膽死，前仗作客利華古遜，成個下半場都處於劣勢，換着第二個教練守和都偷笑，但佢同旗下球員仍然唔肯放棄贏波夢想，最終真係絕殺對手，今晚作客去到安聯球場判輸嚟踢，隨時會有意外驚喜，事實上賀芬咸近三次對拜仁輸波都係一球起兩球止，讓球主客和拜仁讓球兩球太過分，黑柴推介2.48倍讓球客勝。
有線61及201台 周六晚10時30分直播