愛斯賓奴守「細」波抗巴塞

猪拉多纳

今晚西甲爆發「加泰羅尼亞打吡」，愛斯賓奴喺主場迎戰巴塞隆拿。兩軍喺周中聯賽快車同樣全取3分，「愛奴」近5仗只係作客輸過畀馬體會0:1表現唔曳，加上打吡戰主場出擊戰意十足，面對巴塞有力一拚。不過巴塞為咗衞冕，今場3分志在必得，博巴塞小勝，捧2.55倍入球細啦！

（now632台周六晚11:00直播）

愛斯賓奴今季入球率唔高，但仍然可以打入聯賽頭十位，全因球隊防守夠晒穩陣。計落佢哋今季聯賽連盃賽，夾埋對咗皇馬、巴塞、馬體會6次，錄得1勝5負，無獨有偶6場賽果都以1:0收場，就知道佢哋有幾守得啦。
域陀華迪斯重創照獲續約

「張峰」相信今晚佢哋戰術不變，先屯重兵喺中後場做好防守，再利用沙治奧加西亞同域陀辛捷斯等人打快速反擊，務求喺呢場大戰偷雞成功。

巴塞最近連贏4場表現弗爆，嚟緊肯定會繼續搶分向榜首馬體會施壓。西班牙《每日體育報》透露，因傷長抖嘅門將域陀華迪斯後日會到德國奧格斯堡接受手術，球會亦表明願意同佢續約，等佢唔憂冇班落可以專心養傷，不過「VV」似乎決心過檔摩納哥未必肯留。

雖然美斯、尼馬、恩尼斯達等狀態不俗，但佢哋今季面對密集式防守經常出現久攻不下，甚至失分嘅情況，早前作客華拉度列全失3分就係最佳例子。今晚作客防守力強嘅愛斯賓奴肯定惡踢，入球睇怕唔會多。