紅軍「大」唔怕熱捧

猪拉多纳

防線唔掂喪攻搭夠

英超「大」激戰上演！近期利物浦所向披靡，聯賽7連勝之餘每場都至少入3粒，鋒力超勁！至於今晚造訪晏菲路嘅熱刺，亦唔係善男信女，尤其係中場大將基斯甸艾歷臣狀態勁弗，絕對有力撕破紅軍嗰條震騰騰嘅防線，小妹預期今仗係一場鬥攻嘅「大」戰，1.42倍入球大熱都照捧！

（now621台周日晚11:00直播）

利物浦上仗回歸晏菲路球場鬥榜尾分子新特蘭，並唔係好似預期中贏得咁輕鬆，臨尾更因為兵疲爭啲被追和，唔好話年事已高嘅謝拉特，就算係年輕中場佐敦軒達臣都踢到疲態畢露。

歸根究柢，都係因為佢哋為咗加強防守力，自對修咸頓一仗起連續4戰都採用「鑽石形」嘅4中場陣式，其中墮得較後嘅3位，助攻之餘亦要助守，雖然造出兩場零失球，但場場都咁跑法又冇人換，點會唔攰先？今場再唔變陣嘅話，就算前線嘅蘇亞雷斯、史杜列治同史達寧入到幾粒，中後場體力用盡後都未必頂得住對手猛攻。板櫈深度不足同後防散亂，隨時成為佢哋今季失去英超冠軍嘅主因。
熱刺艾歷臣弗到漏

好彩，紅軍中場點唔掂都好，鋒力一樣咁堅，今季喺聯賽15仗主場贏足13次，以喪攻代守，熱刺要一報首循環吞5蛋之辱的確有難度！

尤其係熱刺近9戰得1仗保住不失，今晚唔使旨意全身而退。不過咁，佢哋件丹麥快翼基斯甸艾歷臣近排真係好弗，上仗更憑一己之力連入兩粒為熱刺反勝修咸頓，要射破紅軍條弱雞防線應該唔難，既然兩軍都咁猛火，入球大梗係捧得過啦！
Data King：利物浦近戰「大」晒

‧熱刺近9戰得1仗半場領先。

‧紅軍近11戰有9場開出半場勝。

‧利物浦連開9口入球大。
乜都玩錦囊：撐埋紅軍半場W

利物浦雖然受兵疲困擾，但估計去到下半場中後段，班紅軍球員先會開始出現體力不繼嘅情況，撞啱熱刺一向慢熱，喺換邊前對住擅於早段搶攻嘅利物浦，好可能會落後一、兩粒返入更衣室，今仗紅軍個半場主勝有1.78倍，絕對博得過。