谷到盡衝聯賽前4愛華頓「客」窒富咸

猪拉多纳

「拖肥糖」愛華頓近排表現起飛，最近已經連贏4場聯賽，Keep住強勁走勢嘅話，絕對有望爬阿仙奴頭殺入前4，爭取來屆歐聯入場券。有晒爭勝動力，攻擊孖寶巴克里同盧卡古又咁Fit，造訪包尾嘅富咸大勝可期，一於捧2.85倍「讓球客勝」！

愛華頓早排連環輸畀倫敦雙雄熱刺同車路士，但兩場敗仗都係僅輸1粒，表現有晒交代。最重要係「拖肥糖」及時反彈，近4場聯賽連殺韋斯咸、卡迪夫城、史雲斯同紐卡素，絕對係強勢沒法擋。查實呢期愛華頓咁勇，巴克里同盧卡古功勞最大。
巴克里轉型大爆發

先講巴克里，呢位「三獅新星」自馬天尼斯上任之後，獲安排出任攻擊中場位置，估唔到踢防中出身嘅佢咁快轉到型，今季已經有5個聯賽「士哥」，近兩仗都有進帳，加埋近4場聯賽有3球進帳嘅「新魔獸」盧卡古衝鋒陷陣，火力都咪話唔得人驚。另外，右閘史密斯高文亦唔嘢小，今季佢已經有6球「士哥」，怪唔之得就連曼聯領隊莫耶斯都想搵佢過檔啦！
富咸對賽輸蝕

Yennie之所以睇小富咸，皆因呢支榜尾隊伍近11場聯賽贏得1場咁大把，新帥馬加夫上任之後似乎幫唔到手。雖然右翼迪查加克服肌肉傷患可以候命，弊在希臘射手美度古同中場悍將柏加都因傷缺陣。再睇埋往績，富咸近8次喺英超鬥愛華頓錄2和6負劣績，加上佢哋係英超「失波王」，31輪聯賽過後足足失咗70球，今晚就算有地利，面對贏到開巷嘅「拖肥糖」睇怕都難逃大敗。