慕遜加柏漢堡做大騷

猪拉多纳

德甲冠軍塵埃落定，阿占先喺度恭喜拜仁慕尼黑，雖然冠軍已經出咗，但歐聯資格同護級形勢都仲好有睇頭，今晚場慕遜加柏主場對漢堡，就關乎呢兩個戰場嘅最終結果。慕遜加柏今個星期前坐喺第6位，仍有機會爭入歐聯，最大武器嘅主場賽事當然不容有失，力爭護級嘅漢堡亦唔想降班，一分都不能少，今場搏錘做「大」騷！

（有線61、64及201周日晚9:30直播）

慕遜加柏歇冬之後表現跌watt，上半季引以為傲嘅主場早前經歷4場不勝，直到上星期對哈化柏林先重響勝鼓。其實佢哋主場攻擊力一樣強，只可惜失球數字激增，歇冬後10場聯賽有9場都要失波，如果唔係射手拉菲爾基達奴已經連續4場入波，慕遜加柏相信已提早同歐聯講拜拜。
漢堡有起色搶3分

唔少球迷都唔想見到老牌球隊漢堡歷史性降班，好在佢哋搵咗史隆卡返嚟救亡後表現有起色，近6場聯賽2勝2和2負表現不過不失，不過佢哋同史特加、布倫瑞克同弗賴堡等護級分子差距只係一場上落，所以史隆卡賽前都落柯打要盡量拎3分，即使查漢奴古要坐波監，相信球隊一樣會照攻搏3分！仲有今日歐洲改行夏令時間，大家記得要早一個鐘開電視睇波呀。
頂占筍盤：慕遜加柏（入球大）