卓爾名駒差啲甩W

猪拉多纳

呂健威今季集中喺谷草同田泥出擊，田草只係贏得6W，仲係集中短途1000同1200米，而對上一場田草頭馬，已經要數到一月頭贏直路賽嘅「寶德」喇。
       
卓爾名駒（左）力壓勝利攻略（右），首先觸線。
勝利攻略抗議無效

尋日威哥終於打破兩個幾月嘅田草頭馬荒，就係憑第八場「卓爾名駒」破悶局，不過過程可謂一波三折，皆因最後150米匹馬外閃，影響衝行咗嘅「勝利攻略」，搞到佢要修正，返嚟只係差個頭位，所以之後就有研訊同抗議，經過十分鐘之後，小組維持原判，馬主文壽強總算鬆一口氣，佢話匹馬轉倉後停咗一輪，要重新操過，轉倉跑完一場有痰要食藥，又影響咗進度，仲話佢要多跑先有狀態嘅一哩馬，今場好彩告唔甩。