恒大踩場全北大無畏

猪拉多纳

上仗結怨挑起中韓戰爭

亞冠盃G組重燃戰火，韓職勁旅全北汽車主場再戰中超班霸FC廣州（廣州恒大），全北上次鬥恒大因為爭議詐胡輸波，賽後主帥崔康熙仲話嬲到瞓唔着，有球迷仲鬧對手收買球證，返到自己地頭實有仇報仇。恒大教頭納比都唔妥對手，今場賽前故意缺席記招，兩軍火藥味咁濃，1.65倍大盤玩得過！

（now 671周三晚6時直播）

兩支中韓勁旅上次交手火花四濺，當恒大領先2比1之時，全北一度扳平，但被球證誤判詐胡，激到全北將帥紮紮跳，最終輸到1比3飲恨而回。南韓傳媒賽後直指球證亂吹，有球迷直斥恒大收買球證，南韓足總更代球會出頭向亞洲足協投訴。全北主帥崔康熙話上次不敵恒大後失眠，南韓傳媒就將今場賽事形容為中韓戰爭，全北要為舉國榮辱而戰，堅唔衰得！
納比缺席記招撥火

恒大連續三年作客全北，賽前記招原定昨日下晝兩點半展開，球隊要求延遲被拒，眼見主人家態度咁囂，主帥納比亦毫不客氣，特登唔安排代表現身記招，佢冒住被罰款同停賽嘅風險，無非都為搞寸對手個Party，呢隻老狐狸認真識玩。恒大射手穆里奇傷勢無礙，另外兩大外援迪亞文迪及艾傑臣亦可候命，火力強勁，但後防主力馮蕭霆受傷冇隨隊，防守力要打折扣。

全北名牌射手李東國上次對恒大取得一個士哥，仍屬大軍進攻主力，佢話今次主場出擊必定搶攻。至於恒大今場贏波就可提早出線，當然唔會放過對手啦，兩隊鬥攻，相信會合演一場精彩入球騷。