明尼路朝聖唔客氣

猪拉多纳

細哨餓波實打甩髀

聽朝自由盃分組賽第4組矚目之戰，衞冕嘅巴西勁旅明尼路將作客哥倫比亞球隊聖達菲。由於呢組形勢緊湊，包尾嘅聖達菲若果今仗贏波，便重燃出線希望，挾地利必狂攻博3分，反而益咗明尼路球星「細哨」朗拿甸奴打反擊，仲有得受讓梗係捧讓球客勝喇。

（周五早上10時開賽）

先講講第4組形勢，上屆盟主明尼路雖然排緊榜首，但其實只係領先包尾嘅聖達菲4分，由於第2、3位嘅FC薩莫拿及國民會只剩番一場波未踢，仲要踢兩場嘅聖達菲無疑略佔優勢，當然大前提係兩場都要搶到分喇，因此今仗主場迎戰明尼路乃背水一戰，定必決心求勝，火力全開狂攻對手。睇番呢支哥倫比亞球隊今屆頭四仗均開大盤，有主攻本錢嘅同時，場場都有失波，亦反映佢哋面對快速反擊嗰陣，後防演出震過貓王。
聖達菲焗攻有隱憂

明尼路上仗分組賽對國民會，王牌球星朗拿甸奴曾喺早段主射12碼宴客，儘管冇耐佢再操刀極刑破網，但最終打成1比1痛失兩分，之後兩場省聯賽「細哨」不但冇正選，連後備都冇份，可能係教頭嘅激將法，藉此激勵佢重拾鬥志，睇番今次出征嘅21人大軍名單，「細哨」榜上有名，今仗佢一定搏甩髀。明尼路今仗贏波固然提早出線，不過和波亦冇蝕底，只要最後一仗賽和FC薩莫拿都可晉級，乘住聖達菲狂攻致後防空虛而打反擊，睇定先食，仲有得受讓咁筍，讓球客勝咪錯過。