祖雲達斯鬥志高「昂」

猪拉多纳

泰維斯誓破歐戰入球荒

歐霸盃今晚戰火重燃，意甲「一哥」祖雲達斯會造訪法甲里昂，合演8強首回合激戰。足足4年冇喺歐戰「士哥」嘅泰維斯，賽前雄心壯志咁話有信心打破入球荒，今鋪對住「一味靠嚇」嘅里昂，有能力先下一城，作客讓半一照捧1.94倍上盤。

（有線61及201、廣東體育周五凌晨3:05直播）

數吓手指，原來泰維斯自09年打後，從未試過喺歐洲戰場入過波，呢位阿根廷射手前晚話：「我一啲都唔擔心（歐戰入球荒），我感覺到入球就快來臨，不過我唔會因為想打破入球荒就失去理智，幫祖雲達斯贏波最緊要！」「野獸」上輪意甲停賽，祖雲達斯亦都以0:2輸畀拿玻里，慶幸係勇戰受傷嘅智利中場維達爾無大礙，今仗將聯同派路同保羅普巴等戰將擔正，人腳點秤都高里昂幾班。
里昂傷兵滿營

今非昔比嘅里昂，啱啱場法甲爆咗單猛嘢，話說過百名里昂足球流氓闖入聖伊天下榻嘅酒店，又拍打客隊隊巴，今鋪祖雲達斯住嘅Novotel酒店比聖伊天住嗰間仲近里昂個格蘭特球場，當地警方講明會「屯重兵」維持秩序，不過聖伊天上輪聯賽都照贏里昂，證明靠嚇呢招唔多Work喎！

再講吖，里昂除咗有中場加連尼亞、丹歷、古艾達科芬拿、守將烏姆迪迪及尼沙美養緊傷之外，就連中場指揮官哥古夫都打埋柴，以「斑馬兵團」對上兩圈作客都照砌低費倫天拿同特拉布宗嘅走勢嚟睇，里昂邊阻到佢哋吖！