李斯特城細盤抵錫

猪拉多纳

惡鬥過後要回氣

又係科娜同大家講吓今日有乜心水推介，科娜今日睇中咗一場英冠獨腳戲，李斯特城主場對錫周三，主隊休息不足唔會搶，揀細盤。

（TVB 302周六凌晨2時45分直播）

榜首「狐狸」李斯特城喺主場迎戰聯賽排十四嘅錫周三，表面睇起上嚟係一場強弱懸殊嘅對決，「狐狸」能夠輕鬆取勝，甚至大炒，不過主隊3日前先惡鬥完韋根，成班「狐狸仔」Chur到盡，而且錫周三有備而來，明知對手咁勁仲會同人鬥攻咩？

李斯特城上場作客同韋根鬥得相當燦爛，「狐狸」喺兩度落後下逼和對手2比2，中場甸夏蒙特臨完場87分鐘頂入頭槌，成功將球隊聯賽不敗紀錄增至20場，不過大戰完3日後又要再戰錫周三，真係鐵人都唔掂，再加上主將華迪仍然有傷在身，今場難上陣，「狐狸」即使贏波都唔慌贏得多﹗
錫周三近11場作客全細

錫周三季初成績勁曳，喺降班區停留咗一排，不過自踏入14年後，成績就穩步上揚，近期亦有代表作，包括大勝昆士柏流浪同伯明翰，呢班波作客踢得好穩陣，以守為主，所以聯賽近11場作客全部開出細盤，作客對住榜首球隊李斯特城相信都會照辦煮碗，今場細盤有2.07倍咁好分頭梗係值得支持。