曼城速咬聖人吼半場大

猪拉多纳

「阿古獸」復出餓波搶韁

有留意開科娜貼波嘅讀者都知我係大盤客，今晚科娜又再同大家推介一場「大」波，曼城主場對「聖人」修咸頓，不過科娜今次唔貼只有1.43倍嘅大盤，改捧2.05倍嘅半場大，因為今季英超爭到咁激，奪標大熱門曼城下輪聯賽要硬撼爭標對手利物浦，今場有阿古路復出嘅曼城唔敢再好似上場對阿仙奴咁放鬆落嚟，一於快快手KO對手，喺上半場入定兩粒保住3分，今仗半場大值得捧場！

（now 621周六晚7時45分直播）

身為利物浦死忠，科娜當然想曼城失分，但理智話畀我聽，曼城今場好難唔贏，佢哋主場威力實在太勁，要佢哋失分，都係等下周利物浦直接喺主場擊敗曼城好過！

講番場波，曼城賽前收到好消息，《曼徹斯特晚報》報到因腿筋受傷抖咗超過3周嘅頭號射手阿古路今場有望復出攻堅，一班「城粉」見番「阿古獸」就梗係「熱烈地彈琴熱烈地唱」喇！其實唔止「城粉」興奮，相信中場大將耶耶托尼都會開心到唱番首《耶耶托尼Yeah Yeah Yeah》慶祝吓，因為終於都有人幫佢分擔吓入球重任，依家以17球成為隊中神射手嘅耶耶托尼狀態超弗，佢喺阿古路傷出、迪斯高狀態飄忽、尼格度低迷嘅情況下「挺身而出」孭起晒入球責任，不過若然阿古路復出，佢冇咁多人Mark實晒，入波都入得輕鬆啲喇﹗
修咸頓反擊搵到食

曼城領隊比歷連尼唔使講就更加High，阿古路喺呢個爭標關鍵時刻復出真係對曼城奪冠極之有利，佢哋上場對阿仙奴已經吸收咗教訓，唔敢再喺上半場贏緊1粒時放軟手腳，以免留有後患，今場一定會喺上半場狂攻修咸頓，攞埋「燕梳球」盡快奠勝。

不過，曼城喺主攻嘅時候亦要小心修咸頓嘅突擊，「聖人」中場兩名大將拉爾拉拿同積洛迪古斯都有一定速度，領隊普捷天奴又鍾意採逼搶戰術，曼城球員隨時畀佢哋迫甩，然後「蝸牛」迪米捷利斯再畀對手爆入禁區射波，所以半場大唔難開出﹗