皇馬追分誓演Good蘇

猪拉多纳

皇家馬德里剛於歐聯8強首回合大勝多蒙特3比0，為晉級打下良好基礎，今晚返回西甲戰線作客皇家蘇斯達可全力出擊。皇馬目前分別落後馬體會三分及巴塞兩分，已經再冇失分空間。
C朗因傷缺陣

雖然C朗受傷唔出得，但皇馬前線火力依然強大。皇家蘇斯達下半季表現飄忽，主場贏得巴塞隆拿，但同時亦輸過畀華歷簡奴、艾美利亞等護級隊伍，依家已經落後第四位嘅畢爾包六分，爭奪來屆歐聯參賽資格機會愈來愈渺茫。而且佢哋近期防線演出唔算太穩陣，對住華、艾兩仗一共失咗七球咁多，前面入埋唔夠後面輸，面對來勢洶洶嘅皇馬唔易踢。皇馬近年專剋皇蘇，過去九次聯賽碰頭共取得八勝一和，如果嫌客W只得1.38倍冇肉食，可取讓球客勝。

另外，據西班牙傳媒報道，皇馬主席皮里茲日前與法甲摩納哥老闆魯博洛夫列夫及曼城高層碧格列斯坦會面，內容涉及三名球員交易，包括皇馬翼鋒迪馬利亞轉投摩納哥、摩納哥射手法卡奧加盟曼城，然後阿古路重返西甲加盟皇馬，講到似層層，成事機會似乎唔細喎。
now 632周日凌晨2時直播