巴塞半場大速決貝迪斯

猪拉多纳

巴塞隆拿周中歐聯主場只能同馬德里體育會踢成1比1，嚟緊下周次回合好關鍵，但佢哋喺西甲仍要爭崩頭，今晚淨係用後備未必穩陣，好彩賽程安排着數，只係對榜尾嘅貝迪斯，今場最好係嗱嗱聲半場入多幾粒，早啲畀主力休息，而喺場中踢緊嗰班亦可以hea踢，慳番啲體力，所以呢場半場大值得捧場。

巴塞依家歐聯同西甲乜嘢形勢，大家玩開波都知，唔嘥篇幅多講，反而大家要留意吓貝迪斯，呢支榜末球隊喺二月曾一度發力，追番不少失地，但近期又跌晒watt，最近三場聯賽輸兩場，護級形勢差到不得了，但咁樣亦有個好處，球員對住巴塞喺明知輸梗嘅情況下，放心一搏，隨時有驚喜，加上巴塞有大杉碧基因傷缺陣，貝迪斯偷雞入番粒唔難，更有利開大。

巴塞明知下仗係關鍵，今仗都係快刀斬亂麻，既然貝迪斯都有機入波，不如玩吓半場大仲好。
對國際足協判罰上訴到底

巴塞被國際足協（FIFA）判罰未來兩個轉會窗禁止交易，會長巴度美奧尋日開記招話「有人」喺３年前已展開「抹黑巴塞計劃」，仲話搜集緊證據，要將呢位攪屎棍揪出嚟，矛頭直指皇馬會長皮里茲。「地上最強」決定上訴到底，最低限度希望簽埋達史迪根，有體育法律專家指巴塞就算打唔甩呢單案，都有機會從輕發落。
now 632周日凌晨零時直播