加罩搏殺心花怒放

猪拉多纳

　　睇過今次排位表，已知摩蔡兩個大馬房定會受人重視，但細心再睇，苗禮德出馬陣容其實毫不遜色，睇牌面擺出全攻陣式，數落匹匹也有機會，有必要優先留意。

　　第四場四班1200米，「心花怒放」其實來港已有一段頗長時間，在2012年12月經已投入操練，無奈在去季兩大閘以後，健康可能出現問題而被迫斷工夫，所以表面是匹三歲馬，但斷不可與一般三歲仔比較，事關來港已有一段較長的適應期，還早早試過大閘。

　　到了今季正式落場，第二回合在田草1200米獲亞，當然是賺了一檔可擺前優勢，但第三回合卻因十二檔之故，選擇縮住來跑，所以落敗我完全沒放在心上。引伸到上次有了縮住來跑是不合適的經驗，十檔也沿用入Q時的前置策略，只可惜該戰一路被迫走三叠望空，蝕盡腳程也頂到埋門才被慳位的「大笑大少」及「百勝不厭」趕過，表面只得第四，但實際演出比起紙上賽績更具說服力。苗禮德安排此駒拼後第二課加眼罩拍閘考驗，今周一再跳一課便儲力出戰，所以無最後試跑也可理解。這眼罩一定有正面幫助，放得出勝望極高。(馬會賽事 首席評述員)