贏到爆後勁殺晒

猪拉多纳

　　今日可能會有雨，落雨跑馬，大家要打醒十二分精神，就算只係雨粉，或者灑咗陣陣細雨，都唔好以為冇影響，總之，一切都要大膽假設，小心研究，千祈咪抱住斷估冇辛苦心態，賭馬要賭得精，賽前裝備好自己，先至好買。

　　第七場本地三級賽1000米。「花月佳期」有陣時跑得好勁，又有時輸到母雷公咁遠，主要原因係氣管問題，周不時跑至出血，陣上又點能夠保持到穩定演出。但係如果佢健康正常，實力唔係人咁品，之前喺呢項路程入Q，只不過輸畀遠征得手嘅「崇山寶」。

　　呢場出馬少少，「神舟十號」好似定過抬油咁，但論到質素，「花月佳期」唔一定在佢之下，跑出水準，有機會偷雞。

　　第八場三班1600米。「贏到爆」連場後上如箭，先係前仗角逐田草1400米，上次增程至1600米，末段一樣衝得好鬼勁。呢次方仔唔再加程，畀隻馬在此程停留，證明搵啱出路。再睇埋呢批對手，好多係五十步笑百步，直路上大家鬥後勁，邊會係佢嗰皮。

　　高嶺福星1200米煞食

　　第九場三班1200米。「高嶺福星」初出跑1400米，部署大膽咗啲，次仗跑1200米，即刻有位置，睇過兩場實戰，何良應心中有數，知道隻馬依家以邊項路程最煞食，所以，今次繼續跑短途，係一個好合理安排。

　　另外，以呢匹馬台型，三班唔會留得住，保守估計，未來必可在二班搵到食。當然，呢場有件硬嘢「飛神」，贏定輸，就要鍊過至知。

    （陳華棟 資深評馬人）