愛華頓贏咗仙講

猪拉多纳

立下宏願做4哥踢歐聯

今晚英超早場爆發歐聯入場券爭逐戰，愛華頓主場硬撼阿仙奴。「拖肥糖」近5仗聯賽贏晒愈戰愈勇，上仗畀富咸住嚟打都能擸晒3分，證明班波行緊好運，依家班波氣勢正盛，不過，想實現打入前4來屆去歐聯賽場掘金嘅宏願，今仗面對第4位嘅阿仙奴實係非勝不可，因贏波不但將進一步拉近積分距離，更握有主動權，為此愛華頓當然不會手軟，主勝不容錯過。

（now 621周日晚8時30分直播）
聯賽5連勝 運都有埋

愛華頓今季在西班牙籍主帥馬天尼斯改造下，打出悅目足球，幾名借將如盧卡古、迪路菲奧及巴利演出Sharp醒，新星巴克里、史密斯高文亦進步神速，令佢哋喺聯賽成績穩步上揚，依家穩守聯賽榜第5位，與來屆參加歐聯只係一步之遙。

除咗馬帥調教得宜外，「拖肥糖」今季又確實幾夠運，就以上仗作客富咸為例，上半場畀對手壓到有氣冇碇抖，後防險象環生，靠門將侯活幾番撲救力保不失，下半場後備入替嘅賴史密夫射門先省中對方後衞改變方向，再彈落失咗位嘅富軍門神大衞史托達膝頭入網，擺明係有運行，依家佢哋喺聯賽已錄得5連勝，咁嘅氣勢對住狀態滑坡嘅阿仙奴，有望將靚績延續。
兵工廠殘陣 作客有難

阿仙奴方面近期黑氣纏身，已連續3仗聯賽失分，先係作客慘吞車仔6蛋，跟住連續兩場主場都只係和波，已被前3隊放甩，如果繼續沉淪，最壞情況會係被擠出前4，連歐聯都冇得踢。所以呢場6分波非常關鍵。

不過，兵工廠傷兵實在太嚴重，如哥斯尼、奧斯爾、韋舒亞、禾確特等統統倦勤，個陣天殘地缺，想搏都有心無力，連主帥雲格都教到冇癮，遲遲未肯續約，並傳出愛徒韋拉會接替佢，咁多壞消息進一步打擊士氣。況且愛華頓今季聯賽主場只係輸過1次，強如車仔都要喪師喺葛迪遜公園球場，只要今仗贏波，便會追貼到只落後阿仙奴1分且仲打少場，為進軍「錢途」無限嘅歐聯戰意必堅，不妨直取主勝。