護級見曙光布倫瑞克攞威

猪拉多纳

德甲早場上演護級戰，榜尾布倫瑞克主場迎戰漢諾威，被視為降班膽嘅布倫瑞克鬥心一流，近期愈戰愈勇，護級形勢由絕望變成大有可能，今晚主場迎戰殘陣兼態沉嘅漢諾咸，極有機會繼續搶分，平手盤撐主隊。

布倫瑞克今屆闊別28年後重返德甲，蚊型球會既莫財亦冇星，年輕教練利巴歷治同陣中大部分球員都冇德甲經驗，一早被視為降班鐵膽，不過佢哋每個人都充滿夢想，每場波都由頭搏到尾，近6場聯賽只輸1場，積分同其他護級對手愈拉愈近，終於見到曙光。
被嘲二奶仔 大打爭氣波

今場除咗係護級戰，亦係下薩克森州打吡，布倫瑞克同鄰居漢諾威一向係世仇，布倫瑞克早年因財困有一段長時間要借用漢諾威球場做主場，經常畀漢諾威球迷譏諷為二奶仔，寄人籬下滋味當然難受，直至擁有自己嘅和諧球場後，每次遇上漢諾威都打甩髀。事實上兩軍多年來交鋒都係主場一方佔優，布倫瑞克近三次主場對漢諾威全勝，每仗都攻入三球，擺明係踢爭氣波。

漢諾威歇冬期換帥，由年輕嘅土耳其教練泰芬高古特接手，上任後頭兩仗一鳴驚人，接連大勝禾夫斯堡同慕遜加柏，可惜只係虛火，之後9場波1勝2和6負重返護級漩渦，近期3連敗愈踢愈沉，前線主力射手馬美迪奧夫及蘇拜治因傷要長抖，，今仗仲有中場大將舒米迪巴治停賽，殘陣面對弗爆嘅布倫瑞克難樂觀。
有線61及64台周日晚9時30分直播