食住個勢爭標紅軍「讓客」扑「錘」

猪拉多纳

今季英超爭標形勢激到爆，奪冠熱門車路士、曼城同阿仙奴都輪流坐過榜首，不過最估佢唔到嘅，就係出名海鮮嘅利物浦贏吓一場，贏吓又一場，家陣仲有望首奪英超錦標添，陣營上下梗係士氣高昂啦！「紅軍」今晚會造訪中游分子韋斯咸，Yennie相信就算要讓到「-1」都冇問題，一於捧1.87倍「讓球客勝」。
近6戰全勝喪入22球

利物浦最近氣勢一時無兩，近6場聯賽全部贏晒，總共炮製咗22個「士哥」，32輪聯賽過後喪入88球嘅火力更加係冠絕英超，當中由史杜列治同蘇亞雷斯組成嘅「SAS」組合最大功勞，迄今包辦咗當中嘅49球波，都咪話唔得人驚，真係同英國嘅著名反恐部隊「SAS」（特種空勤連）一樣咁勁！

作為球迷，今季睇利物浦真係一種享受，史杜列治同史達寧兩邊側擊，配合隊長謝拉特中場支援同傳送，加上「哨牙蘇」嘅刁鑽射門，娛樂性十足不特止，Yennie夠膽講呢個攻擊組合真係所向無敵，韋斯咸今晚就算有地利都好難有運行！
飄忽韋斯咸冇嘢好爭

「錘仔幫」今季表現大上大落，季初跌過入降班區域，2月份嗰時曾經反彈連贏4場聯賽，但去到3月又經歷3連敗低潮，表現飄忽成咁，就算近期連殺侯城同新特蘭都信唔過喎！論人腳同實力，韋斯咸絕對唔夠利物浦砌，況且呢支倫敦球隊唔上唔落、冇嘢好爭，戰意一定唔及「紅軍」，今鋪「錘仔幫」輸少當贏啦！