布倫 漢諾威打吡「大」廝殺

猪拉多纳

死羊做「戰書」火藥味濃

德甲今晚爆發「下薩克森州打吡」大戰，由榜尾嘅布倫瑞克主場火併同樣為護級搏命嘅漢諾威。兩軍球迷向來仇恨對方，首循環賽事亦爆發騷亂。今次交手之前，漢諾威被人送上一隻死羊做「戰書」！大戰火藥味咁濃，睇怕雙方球員都唔慌會留手，一於捧1.85倍入球大。

（有線61、64、201及203周日晚9:30直播）

德國《圖片報》尋日報道，漢諾威喺當地時間前日朝早7點，發現訓練場欄杆被人吊上一具羊屍，屍身被噴上代表球隊作客波衫嘅綠色，附近又寫住「星期日就輪到你哋，你哋班那渣嘅禽獸」。漢諾威隨即報警，雖然未有實質證據，但普遍相信件事由布倫瑞克狂迷所做，漢諾威總經理杜夫尼更怒插兇徒「行為極度卑劣」！
p:3300警察當值 防爆發騷亂

咁都未算，當地警方為咗維持秩序，今晚一共派出3,300名警察當值，數目比多蒙特對史浩克04嘅「魯爾區打吡」仲要多。賽前漢諾威亦呼籲球迷唔好自行揸車去球場，亦唔好帶上印有漢諾威嘅旗幟，以免刺激「布粉」危害個人安全。漢諾威亦同執法部門合作，提供50架大巴，喺警方護送下接載約2,300名球迷入場觀戰。

搞到咁大陣仗，可以預期呢場波會好激烈。布倫瑞克近8仗轟入14球火力穩定，今次對住漢諾威肯定繼續搶攻兼搶分。雖然漢諾威近況回落連敗3場，當中防線更失咗8球咁多，守將舒米迪巴治又要停賽，但佢哋同樣想揚威打吡戰，睇怕都唔會縮。與其估邊隊贏，不如捧入球大仲着數。