黑貓有望偷雞

猪拉多纳

英超包尾大幡新特蘭今輪壓軸登場作客熱刺，兩軍主帥曾經喺熱刺並肩作戰，如今各為其主冇人情講！「黑貓」深陷降班危機，教頭普耶已無退路，呢次對住防線嚴重不穩嘅熱刺，有利發揮穩守突擊戰術，可博有2.42倍嘅讓球客勝！

（now 621周二凌晨3時直播）
昔日戰友冇面畀

普耶2001年離開車路士轉投熱刺，當時同現任熱刺教頭舒活喺中場拍住上，兩人都係領軍之材，收山後同樣執起教鞭。舒活賽前向傳媒表示：「我當年有冇諗過普耶會教波？梗係有啦！佢天生係個領袖！」舒活仲祝福舊拍檔：「希望佢可以幫到新特蘭護級成功，不過在我嘅立場就梗係唔想佢喺今場反彈啦！」

熱刺上場對利物浦淨吞4蛋，再次暴露舒活嘅戰術弱點，佢唔鍾意用正宗防中，中場中無論用辛度雲尼亞里、迪比利或賓達納都係要佢哋幫手助攻，令後防前面缺少一道屏障好似穿咗個窿。熱刺後防最勁嗰個維頓漢傷緊，卡保奧係超級炸彈，而戴臣亦唔穩陣，右閘基爾獲加又養緊傷，替補人選基爾洛頓唔掂，橫睇掂睇呢條防線可謂曳爆，即使射手艾迪巴約可望復出，估計都係入埋唔夠輸！
作客搶分靠反擊

新特蘭教頭普耶臨到護級生死關頭作風保守，鍾意縮喺後面伺機打反擊，利用波連尼作高速突破。「黑貓」上輪鬥韋斯咸早段失波，被迫改變踢法主攻，根本唔係佢哋最擅長嗰瓣，呢次對熱刺牌面睇處下風，但對手防線空位多，更有利佢哋偷襲。新特蘭依家打少3場落後尾4嘅諾域治7分，再冇失分空間，今次搏盡唔係冇得打，受讓博得過！