PSG冇伊巴心慌慌 車仔再闖史丹福橋奇迹

猪拉多纳

歐聯8強次回合上演英、法富豪球會對決Round2，車路士回師主場迎擊巴黎聖日耳門（PSG），車仔首回合輸緊1比3，形勢同2011至12季度16強鬥拿玻里完全一樣，當年佢哋創造史丹福橋奇迹踢走對手，PSG現時進攻重心卡雲尼同拿維斯嗰陣正係拿玻里主力，呢次車仔將士撞番「手下敗將」信心更強，有力再製造經典大逆轉好戲，推介1.75倍主W！

（有線61及201台周三凌晨2時45分直播）
卡雲尼拿維斯曾歷噩夢

車路士當年鬥拿玻里首回合作客輸1比3，當時冇乜人相信球隊可以晉級，車仔次回合憑杜奧巴及泰利士哥重奪出線主動權，雖一度被拿玻里中場恩拿射成2比1再陷劣勢，但班波鬥心真係好勁，先由林柏特射入十二碼法定時間內贏3比1，加上伊雲洛域加時建奇功完成大逆轉，為最終稱霸歐聯嘅偉業打好基礎。上述幾個士哥拿只得杜奧巴走咗，其餘三人仍然在陣，至於拿玻里兩大球星卡雲尼同拿維斯已過檔PSG，呢次一眾球星再度交手，車仔班兵心理上必定佔優。
今季主場專打老虎

兩軍首回合高手過招，查實車路士唔係冇機會殺敵，若然夏薩特喺雙方踢成1比1時嗰球命射唔係中柱唔入，依家已經係兩個世界。車仔今場缺少兩大防中，尼曼查馬迪之前幫賓菲加打過歐聯唔出得，而拉美利斯要坐波監，中場中要搵老將林柏特造波，大衞雷斯負責掃蕩，係就係冇咁搶得，但球隊形勢上要焗攻，點都要冒險。至於箭頭伊度奧未好番晒，主帥莫連奴話希望佢可以做後備。車仔今季主場踢大戰從未失手，贏過曼城、利物浦、曼聯同阿仙奴，關鍵時刻又可發揮史丹福橋威力！

巴黎聖日耳門今屆歐聯九戰轟入廿五粒，士哥數字僅次於皇馬，當然唔係好惹啦！不過，喺今屆賽事貢獻十球嘅王牌前鋒伊巴謙莫域受傷休戰，令到卡雲尼要擺番喺中鋒位置，中場同前線連繫肯定冇上場咁好。車仔舊將阿歷士洛里高喺防線中路唔係咁穩，隨時畀夏薩特及韋利安等靈活球員玩謝，今場一於捧主勝！