莫連奴痛「失」天才！

猪拉多纳

每逢車路士輸波，往往可以喺賽後記者會，從主帥莫連奴口中，獲得足球啟示。車仔喺上周中歐聯8強首回合不敵巴黎聖日耳門，莫帥斬釘截鐵話，球隊由上半場天堂，下半場跌落地獄，皆因球員犯咗好多錯誤，前鋒把握力弱。言語之間，反映車仔目前困境，就係缺乏可扭轉乾坤嘅天才球員。

車仔首回合原本形勢唔錯，上半場扳平1比1，取得作客入球，但換邊後卻有大衞雷斯擺烏龍，臨完場前仲畀對手死位突破，輸夠兩球，形勢即急轉直下。事實上，呢兩球失波都可以避免，難怪莫連奴又嬲，又無奈。另一個令莫帥頭痛嘅地方係前鋒入波能力差，唔能夠將一啲「半機會」轉化成入波。相反，睇下聖日耳門前鋒拿維斯首回合就做出一次高難度入波，正係勝負主要分野之一。
出乜絕招今晚最大看點

莫連奴今季從未發表奪冠宣言，一來以免球員有太大壓力，二來車仔的確未具體捧盃把握。不過莫帥排兵布陣能力，始終屬於世界一級水準，老將林柏特亦向佢投下信心一票，話對住巴黎聖日耳門呢種人腳鼎盛嘅豪門，唔可以單靠蠻力對抗，而係由第1分鐘，就要根據部署踢出完美足球，當決賽咁全情投入。到底莫連奴有乜招數，進行絕地反擊，成為今晚最大看點。

金句：天才可抵銷不必要錯誤