車仔PSG大激鬥

猪拉多纳

密謀重演奇迹 晉級每人480萬

歐聯8強今晚上演次回合生死戰，首回合作客輸波嘅車路士，今晚必喺史丹福橋球場狂攻巴黎聖日耳門報仇，力爭重演當年反勝拿玻里晉級一幕。不過PSG嘅銀彈戰術亦好有睇頭，如果今晚入4強，每個球員就穩袋45萬歐元（約480萬港元）獎金！預期兩隊進攻會拳拳到肉，一於博1.9倍入球大！

（有線61、64、201及203周三凌晨2:45直播）

莫連奴作風冇錯係以穩為先，不過首回合輸到1:3，已經唔到佢睇定嚟食。英國傳媒近日盛傳「寸王」夏天會同時踢走費托、伊度奧同丹巴巴亞3名前鋒，佢哋知碇嘅就肯定會爭氣，好似16強對加拉塔沙雷，費托咪喺責罵聲中入波，話唔定今場又會再嚟過。
費托 伊度奧被鬧爭氣

不過PSG都唔係善類，佢哋老細仲出到超級重賞爭晉級添！據報以伊巴謙莫域、堤亞高施華同蘇馬拉卡馬拉為首嘅球員代表，成功講掂球會掟出巨額獎金，除咗早前公布嘅歐聯冠軍100萬歐元重賞外，只要躋身4強每人都可袋走45萬歐元，入到決賽再多20萬歐元。如果PSG今季做三冠王，單係獎金就有155萬歐元收入（歐聯100萬、法甲50萬、法聯盃5萬），球員唔搏就假！
伊巴謙受傷缺陣

雖然伊巴謙莫域大髀肌肉受傷，但卡雲尼同拿維斯仍然係歐洲頂級前鋒，而且球隊有兩球優勢在手，今場大可踢擅長嘅穩守突擊，相信會為車仔防線帶嚟唔少威脅，小弟有預感今場入波未必會少得過首回合，捧1.9倍入球大！
聖日耳門11連勝

巴黎聖日耳門計埋盃賽已經連贏11場。

車路士今季主場僅1敗。

車路士主場已經連續8場保持清白身。
藍戰士要面吼主W

車路士上仗聯賽收起夏薩特等主將，擺明留力今場搏殺。藍戰士主場威力強勁，就算未必反壓PSG出線，但相信至少可砌低對手，1.75倍主勝值博。
首回合：車客負1:3

頂占筍盤：車路士（入球大）