皇者拍檔首本路W

猪拉多纳

　　莫雷拉停賽復出即騎足八場，又必然成為今晚谷草賽事的焦點，不過同樣騎足嘅潘頓，計坐騎實力其實有過之而無不及，隨時可以連場數胡。當中第七場方嘉柏馬房的「皇者拍檔」，自季內專攻今戰之谷草1650米後，演出相當穩定，五戰共獲冠亞季各一及兩殿，上仗增程跑1800米則明顯長多少，直路衝刺未算太勁。今次唞番兩個月跑首本路程，在體力較對手優勝下，有望取得今季第二W。

　　葉楚航馬房「真慷慨」今仗重戴眼罩、頭罩及綁脷，乃贏馬時之配件，兼回配曾兩捷的賴維銘，有晒搏殺手影；至於廐侶「香港興旺」兩戰同程均上名，當中上場排11檔全程快放下亦入Q，表現出色，兩駒宜一併兼顧。

　　另外，第三場三班1200米，告東尼馬房「英勇大師」大前仗同程贏馬姿態驚人，已知不簡單，上仗再攻此程配韋達，殊不知13屆冠軍騎師走位論盡，致後上不及僅得第三，今原庄人馬捲土重來，只要發揮正常，篤定補中。

　　冷門提供何良馬房「健康真知」，雖屬初跑谷草，但上月尾一課谷閘後追悅目，有埋一檔不可忽視。向東