英勇大師持續進步

猪拉多纳

　　今晚8場谷草B欄賽事，好彩冇雨落，唔係又唔知點算。而雷神復出，亦係馬迷天大喜訊，但唔好怪我口多，阿棟份人有碗話碗，佢老哥依家魅力四射，騎豬都會熱，不過，唔係熱親就等於必勝，總之，乜神都好，我千祈咪盲捧。

　　第三場三班1200米。「英勇大師」前仗蔡仔真係抵鬧，跑到不知所謂，上次告東尼即刻配韋達再搏過，雖然只係跑個P，廿幾蚊馬都贏唔到，好似係咁上下，但計到上一場，都係隻馬咁大個仔第4仗，呢啲年輕馬，進度一旦踏入上升軌道，短期內進步可以好大，一日千里唔係誇張。

　　同時，呢匹馬隔晚賠率熱到癲，睇到票數咁鬼勁，點會唔係想補中。

　　第六場三班1650米。「方程式」搏來搏去贏唔到，係就係有啲失運，季中場場郁手，可惜硬係遇到高手，好似係「迎風飄揚」同「一見鍾情」。

　　方仔上次安排「方程式」轉戰田草，弊在賽事途中遇到阻窒，令到拉士追唔切，不過，隻馬連田草都掂，睇嚟依家嘅能力比起季中有所進步，今次重返谷草，對手唔算難啃，係跑隻3號仔啫，一於單W單Q。

　　第八場二班1000米。「美麗昇華」跑谷草係得此程啱，真係死路程馬，但咁有咁好，對我哋馬迷嚟講，唔使估佢係咪真波，一見隻馬跑呢程，差唔多等同必拼。

　　「美麗昇華」呢次排到1檔，形勢有利，更加好跑，而仲要搵個韋達上去，睇嚟告仔好想幫匹馬執番場。陳華棟 資深評馬人