馬體會唔驚巴塞

猪拉多纳

全場逼搶 廢美斯武功

今晚歐聯8強次回合另一場西班牙內訌Round 2，勢兇夾狼嘅「床單兵團」馬體會主場再戰巴塞。雖有鋒霸迪亞高哥斯達因傷好大機會缺陣，但呢班筋肉人超硬淨，治到巴塞一戙都冇，挾住今季4戰未輸過嘅氣勢，揸住一粒作客入球可以睇定嚟食，加上喺地獄主場出擊竟然仲有得受讓真係筍爆，讓球主勝必捧。

(有線62及202台周四凌晨2時45分直播)
迪哥缺陣韋拿孭飛

首回合巴塞僅靠尼馬嘅入波1比1逼和馬體會，「床單兵團」不惜氣力打全場壓迫，甚至有段時間夠膽搵6名球員於前場進行逼搶，全場波佢哋犯規24次，攔截35次，食咗6張黃牌，呢種戰術猶如一道銅牆鐵壁，憑基比、堤亞高文迪斯、佐治高基、阿達杜倫等同心協力，成功將巴塞球員困喺外圍入唔到禁區，令「地上最強」踢唔出流暢嘅進攻，可見主帥施蒙尼呢招非常高明。

不過上仗有鋒霸迪亞高哥斯達傷出，馬體會一直未有透露佢嘅傷情，但西媒爆料「迪哥」肯定趕唔切今仗披甲。預計倒戈嘅韋拿會打單箭頭，配合坐完波監復出嘅後上殺手魯爾加西亞攻堅，攻擊力未削弱太多。此外以往當「床單兵團」係私房菜嘅美斯最後一次攻破對方大門已經係12年年尾嘅事，近5場對陣全面啞火一球不入，都咪話唔邪。
防線滿布計時炸彈

由於首回合畀馬體會搶到個作客入球，若果呢場互交白卷的話巴塞都要出局，形勢上佢哋要焗攻，但卻有後顧之憂。門將域陀華迪斯重創長抖、一對碧基同佩奧爾齊齊倦勤，經驗不足嘅小將馬斯巴查、客串中堅嘅馬斯真蘭奴同副選門將賓度恍如防線嘅幾枚計時炸彈，如前鋒咬唔入對方硬淨防線，馬體會隨時趁佢哋後防不穩偷襲得手。

況且馬體會今季4戰「地上最強」全數打和，依家又喺聯賽lead住巴塞，信心爆棚，而佢哋今季26仗主場豪取21勝4和1負堅爆戰績，讓球主客和竟然仲獲受讓，1.67倍嘅讓球主勝咪嫌少啦！
領隊Chit Chat

施蒙尼(馬德里體育會)：唔好以為有作客入球就有好大優勢，因為巴塞可以喺5分鐘內入番你兩球，佢哋今仗一定會瘋狂反撲，就算有主場之利仍會比首回合難踢。

馬天奴(巴塞隆拿)：形勢對我哋稍稍不利，但我手上仍然有幾套唔同嘅進攻戰術，我份人一向樂觀，如果打唔入4強，今屆就等同失敗。
Player Browser：賓度（巴塞隆拿門將）

正選門將域陀華迪斯重創長抖，令呢位長居後備啲38歲老將要臨危擔正，但佢表現患得患失，首回合所失一球佢要負上好大責任，今仗再鬥馬體會，到底佢能否踢番場爭氣波，將成巴塞能否晉級嘅關鍵。
韋拿（馬德里體育會前鋒）

迪亞高哥斯達唔出得，佢將肩負更大入波重負，呢位32歲西班牙名將極希望爭取重返西班牙國家隊踢今夏世界盃，如果佢可以喺呢場大戰顯身價，踢巴塞出局，肯定有助博取西班牙主帥迪保斯基嘅歡心。
歐聯密碼

0:兩軍於今屆歐聯至今都係0紅牌。

03:美斯20次對馬體會轟入19球，包括3次帽子戲法。

07:巴塞如晉級，將係連續7屆殺入準決賽。

21:由分組賽至今9場賽事，兩軍同樣射入21球。

50:馬體會106次主場對巴塞，獲50勝23和33負。