祖記細盤靠晒里

猪拉多纳

魚生粥戰術熟到爛

歐聯過後，今晚輪到上演歐霸盃8強次回合，大熱奪標祖雲達斯主場鬥法甲里昂，祖記大踢穩陣波，往往點到即止，小勝收場，攤路好易捉。尤其係首回合贏1比0後，今仗更加唔使急，實行照辦煮碗，再「煲魚生粥」。法甲褪色豪門里昂態沉多時，想反撲亦有心無力，好難攻入對手鋼鐵防線。祖記主Ｗ冇咩投X價值，讓球主勝風險又高，最好再追1.95倍入球細。

（有線61及201台周五凌晨3時05分直播）
近13場近半開1:0

祖雲達斯喺意甲甚至歐霸盃，級數都係鶴立雞群，但教練干地好孤寒，奉行「1:0」策略，由2月中至今，近13場賽事有12場開細，當中有6場贏1比0，比率接近一半，包括首回合戰至尾段，由後衞邦路斯一箭定江山。呢種戰術的確好沉悶，但干地只會從自己角度出發，總之贏波就得，懶理好唔好睇，既然策略奏效，更加冇改變嘅理由。

另外，早前受傷嘅射手泰維斯雖然上仗聯賽復出，但表現未如理想，踢咗約1個鐘就被換走。球隊今仗冇需要贏波，干地或者會畀佢休息。事實上，干地鍾意派後備前鋒奧斯華度踢歐霸盃，但此子埋門把握力低，唔好期望佢會有大貢獻。
里昂季尾曳到痹

至於里昂季尾演出走樣，包括盃賽在內，近6場輸4場，踢歐霸盃亦顯得力不從心。首回合即使有地利，但攻門次數及控球比率都少過對手。畢竟呢班波處於重建時期，難以兼顧雙線作戰，而且陣中有唔少年輕球員，經驗比較輸蝕，好難喺祖記身上偷到雞。值得一提，從未有法甲球隊作客贏過祖雲達斯，以里昂目前景況，連入波機會都好低。