西維爾着晒火謀收復失地

猪拉多纳

今晚歐霸8強次回合續有伊比利亞半島內鬥，西班牙球隊西維爾返主場硬撼葡萄牙班霸波圖。首回合西維爾打得較保守之下，只輸0比1可謂求仁得仁，今仗一班攻擊手卡路士巴卡、加美路、拿傑迪錫等磨刀霍霍，乘住波圖有防中費蘭度法蘭斯高及箭頭積臣馬天尼斯停賽，誓必搶攻收復失地，西維爾小讓平半兼低水，擺明有計，斯維力撐上盤。

（有線62及202台周五凌晨3時05分直播）

斯維記得首回合都推介波圖畀大家，因為佢哋爭聯賽無望，惟有轉攻盃賽，雖然波圖不負所託以1比0贏波，但睇番成場波，佢哋喺早早先開紀錄、略佔上風之下，始終未能整多粒，為次回合種下懸念。西維爾主帥艾美利亦非常醒目，首回合作客穩陣行先，正選收起幾弗嘅前鋒加美路，結果只輸一球已經達到目標，一於留番返主場先同你死過。
波圖雙星停賽影響大

事實上西維爾走勢唔錯，早前喺主場更勇挫皇馬，依家衝上聯賽第5位，除咗加美路之外，其餘攻擊手如卡路士巴卡、拿傑迪錫、查路森巴利奧、雷恩斯等呢排都着晒火，咁啱波圖有硬淨防中費蘭度法蘭斯高首回合領紅，今仗要坐波監，勢必令防線暴露更多空位，加上箭頭積臣馬天尼斯亦儲夠牌要停賽，攻不銳、守不穩之下，頂唔住西維爾嘅狂轟猛炸。況且西軍小讓平半只得1.67倍，睇嚟備受莊家睇好，呢個上盤不容錯過。